BUTUAN CITY – Mi-ani ug pagdayeg ilabina sa social media ang pagtabang sa kapulisan sa Nasipit, Agusan Del norte sa usa ka manganakay’ng buros sa niaging gabii diin sa ila pa kining patrol naka-anak.
Sa pakighinabi ning sibyahan kang SPO1 Ferdinand Galacio sa Nasipit Municipal Police Station, gisaysay niini nga miadtu sila sa Barangay Culit sakop sa maong lungsod aron makigkita sa kapitan ug sa dihang mupauli na sila, nakita niini ang gi-agak nang buros ug muadtu unta sa birthing clinic.
Tungod kay gabii na ug nakita niini nga nagping-it na sa kasakit ang babaye, ila nalang kining gipasakay sa patrol ug gidala sa Nasipit District Hospital.
Apan gihimugso na sa inahan ang iyang baby girl diha sa patrol pinaagi usab sa pagtabang ni PO1 Gora nga nakahuman sa kursong nursing.
Misaka nalang matud pa ang midwife sa patrol aron putlon ang pusod sa bata adiser sila gipahimutang sa maong ospital.
Gikonsidera pa ni SPO1 Galacio nga co-incidence ang paguban ni PO1 Gora nga maoy nahimo nilang back-up.
Apan gibutyag sa opisyal nga sa bisan unsang insedente, andam motabang ang kapulisan tungod kay kini ang lakip sa tawag sa kinabuhi.
Sa pagkakarun, naghulat matud pa sila nga kuhaong mga ninong sa maong bata gikan sa pamilyang Danuco.(rolan)
