BUTUAN CITY – Padayon ang gilusad nga manhunt operation og imbestigasyon sa kapulisan sa Cabadbaran City sa lalawigan sa Agusan del Norte aron ma-ila og masikop ang responsable sa pagpamusil kagabii nga miresulta sa pagkamatay sa tulo ka mga tawo og pagka-angol sa laing usa.
Naila ang mga namatay nga sila Junjun Tundag, Edmark Antiola og Jeffry Mantilla samtang ang angol mao si Arnold Antiola, 22-anyos, ulitawo pulos residente sa Brgy. Bangunay, lungsod sa Jabonga sa susamang lalawigan.
Sigon ni City Police Director P/Chief Insp. Solomon Alemaña, igo lang nagtan-aw sa mga Christmas decors sa Rizal Park sa ilang siyudad ang mga biktima og nagdesisyong mag-videoke.
Dinhi na matud pa miduol kanila ang naka-jacket og naka-bonnet nga lalaking sakay sa motorsiklo dayong pamusil nga naala-an pa nilang pabuto lang hangtud nga nakita na lang nga nagbuy-od na ang mga biktima.
Apil sa susihon sa ilang pwersa ang record sa mga biktima sa lungsod nga ilang gipuy-an aron masuta kung duna ba’y kutay sa ilegal nga druga ang pagpamusil kanila. (Beth Ruiz)
