BUTUAN CITY – Tungod sa kawala na matud pa’y budget, mi-abot sa 95 ka mga job order personnel sa Land Transportation Office kon LTO-Caraga ang apektado sa pagkalangay sa ilang sweldo.
Sa pakighinabi sa Bombo Radyo Butuan kang LTO_Caraga public information officer Christina Casion, gibutyag niini nga adunay mga personahe sa nakalabay’ng bulan sa Setyembre ug Octobre ang wala nasweldohan tungod kay kabilin matod pa sila sa nangaging administrasyon.
Samtang aduna usa’y uban nga wala nasweldohan tungod sa kakulangon sa papeles human nga wala nagsubmite ug Daily Time Record kon DTR.
Giklaro ni Casion nga naghulat na lang ang ilang buhatan sa supplemental budget gikan sa central office higayong mapirmahan na ang memorandum agreement tali sa Central office ug Regional office.
Nagpasalig si Casion nga gipaningkamotan nilang mapadali ang proseso ngadto sa central office aron matubag na ang yangongo ug masweldohan na ang maong mga Job Order personnel. (Rolan Janea)
