BUTUAN CITY – Nakatakdang dalhon ngadto sa Tandag City Police Station alang sa tukmang pagpasaka og kaso ang 8 ka miyembro sa Budol-budol” Gang human kini nadakpan sa police checkpoint sa Sibagat, Agusan del Sur sa nakalabay’ng adlaw.
Sakay sa Tamaraw FX ang mga suspetsadong sila Fernandito B Espada, ang Driver, 57-anyos; Fely V Espada, 67-anyos; Fernandito V Espada Jr, 27-anyos nga mga residente sa Purok Santol, Brgy Filomena, Cateel, Davao Oriental; Hero P Manalo, 25-anyos; James Zacary V Demellites, 31-anyos; Lizel N De Guzman, 40-anyos; Erleen P Villarino, 44-anyos og Roselle B Ello, 27-anyos nga mga residente sa Purok Ningas, Sta. Filomena, Cateel, Davao Orriental.
Nasayran nga misibat na ang mga niini human mibiktima kang Marlyn Hontanosas Erizo, 63-anyos, costumer sa Shoppers Delight sa Donasco Street, Brgy Bag-ong Lungsod, Tandag City, Surigao del Sur alas 11:30 sa buntag.
Base sa imbestigasyon, namalit lang ang biktima sa dihang sekretong gikuha sa mga suspetsado ang pitaka nga anaa sa iyang shoulder bag nga dunay sulod nga 15-mil pesos.
Ang maong insedente nakuha sa CCTV footage nga gi-installed sa establishmento. Gelayon nga nakig-alayon ang mga Personahe sa Tandag City Police Station sa kasikbit nga mga police stations ug naglusad sa hot pursuit operation.
Alas 4:35 na sa hapon sa dihang napara sa Sibagat Municipal Police Station ang sakyanan nga dunay susamang description sa taho nga gipaabot sa ilang gimontar nga checkpoint.
Positibo usab nga giila sa Tandag City police ug biktima ang nasangpit nga mga suspetsado nga gikustudiya sa Sibagat police station alang sa tukmang disposasyon.
