BUTUAN CITY – Aminado si Kat Cortez – media safety officer sa National Union of Journalists of the Philippines nga usa sila sa mga subjects sa pamahayag ni Pangulong Rodrigo Duterte kalabot nga matud pa nagpabayad aron lang dauton ang anti-illegal drug campaign sa administrasyon.
Sa eksklusibong pakighinabi sa Bombo Radyo Butuan, gibutyag ni Cortez nga kini tungod na usab sa pagka-kritikal kaayo nila sa pagpublisar og pagkomento sa mga isyung duna’y kalambigitan sa katungod sa mga media men og uban pang tawhanong katungod nga gipig-utan sa administrasyong Duterte.
Nasubo si Cortez tungod kay wala matud pa mahuna-huna-i sa pangulo nga ang trabaho sa mediamen dili lang ang paghatud og balita sa kaayuhang nahatag sa gobyerno kondili apil na ang mga iregularidad sa pagpadagan sa kagamhanan.
Gihimo pa niining pananglitan ang pagbantay sa posibleng natigayong kurapsyon, malpractices ilabina sa paggamit sa gahom, nayatakang tawhanong katungod.
Ang gikatakdang pagpagawas sa pangulo og listahan sa mga media entities nga gika-ingong nagpabayad aron lang dauton ang iyang anti-illegal drug campaign, usa matud pa ka pag-atake sa mga journalists nga kritikal sa iyang administrasyon.
Ang iya lang kwestyon, validated ba ang ipagawas nga listahan.
