BOMBO BUTUAN – Gibana-banang mu-abot sa 600 hangtud sa 1,000 ka mga overseas Filipino workers o OFWs sa Switzerland ang mutambong sa ‘Meet and Greet’ kang Pangulong Ferdinand ‘Bongbong’ Marcos karong Biernes sa alas-dies sa buntag, oras sa Switzerland samtang alas-singko usab sa hapon, oras dinhi sa Pilipinas.
Sa eksklusibong interview sa Bombo Radyo Butuan, gipadayag ni Bombo international correspondent Eppie Balagasay-Laschinsky, coordinator sa Filipino Community sa Switzerland sa maong event, mala-umon silang mga OFWs nga ang pagtambong ni Pangulong Marcos sa World Economic Forum mahimong daan aron mas mapalambo pa ang atong ekonomiya ug pakignegosyo sa uban pang mga nasud.
Dugang pa ni Laschinsky, unta mahimo kining dalan aron mapa-abot sa pangulo ngadto sa mga mutambong nga world leaders ang mga dapat pang himuon alang sa mas ikalambo pa sa atong nasud ug sa panginabuhian sa mga Filipino ilabina nga manambong ang mga dagkong investors gikan sa nagkada-iyang panig sa kalibutan.
Sa pagkakaron, mu-abot na sa kapin 25,000 ka mga registered Filipinos ang nagtrabaho ug nagpuyo karon sa maong nasud.
