BUTUAN CITY – Wala damhang kamatayon ang nahi-aguman sa usa ka lalaki human kini nadat-ugan sa gisakyan niyang grader kagahapon sa buntag sa Purok 1, Brgy. Cabantao, lungsod sa Rosario, Agusan del Sur.
Naila ang biktimang si Renate Rodrigo Gamba Sr., 47-anyos, residente sa Purok 2, Brgy. Poblacion sa susamang lungsod.
Sigon ni P/Insp. Gary Buñao – hepe sa Rosario Municipal Police Station, padulong na sa ilang project site ang grader nga gimanehuan ni Erwin Fuentes Ega, 37-anyos, residente sa dapit nga nahitabuan diin sakay usab ang biktima apan dihang pasaka na sila, mikalit lang og kamatay ang makina sa nasangpit nga sakyanan og tungod kay hydraulic, wala gilayon kini mi-andar apam mi-atras na hinuon.
Daling gi-maneuver ni Ega ang maong sakyanan apan natumba kini nga natayming usab sa pag-ambak ni Gamba rason nga nadat-ugan kini nga miresulta sa iyang hinanaling kamatayon.
Gipasabot pa sa police officer nga ang mga nakaparadang motorsiklo unta sa atbang nga bahin ang posibleng mabiktima kung wala pa kini gi-maneuver sa driver.
Gidugang sa opisyal nga ang maong grader gipanag-iyahan sa Dave Construction nga gipanag-iyahan usab ni Alvin Otaza nga nakabase sa Brgy. 5, lungsod sa San Francisco, Agusan del Sur. (Beth Ruiz)
