BUTUAN CITY – Gideklarang dead on arrival pag-abot sa ospital ang magti-ayong Rendon human gipangluba pasado alas 7:10 kagabii sa Purok 3-A, Barangay Holy Redeemer ning dakbayan sa Butuan.
Base sa nakuhang impormasyon sa Bombo Radyo Butuan, ning mi-aging adlaw pa nagbikil ang magti-ayong Nina Rendon, 70-anyos ug Emmanuel Rendon, 65 anyos ngadto sa suspek nga si Jojo De Sena Duran, 33-anyos parehong mga residente sa nasangpit nga lugar.
Sumala ni George Atenta, silingan sa mga biktima sa eksklusibong pakighinabi sa Bombo Radyo Butuan, nisinggit na lang ang tag-iya sa ilang gipuy-an nga magkuha ug sakyanan aron madali pagdala sa balay tambalanan ang mga biktima.
Nasayran nga gisulong kagabie sa suspek nga si Duran ang mga biktima diin dunay natigayong panaglalis nga nisangpot sa pagpangdungab.
Gamit ang ice pick, nakahi-agum ug duha ka samad dinunggaban si Nina sa iyang dughan samtang nadunggaban usab si Emmanuel sa iyang dughan, liog ug suwang.
Kasamtangan usab nga nagpa-alim sa Butuan Medical Center ang suspek sa naaguman usab niining samad dinunggaban. (Melody Valledor)
