BUTUAN CITY – Nagkada-iyang libreng medical services ang gihanyag sa National Nutrition Council kon NNC-Caraga subay sa pagbukas kaganina sa kasa-ulugan sa 50th National Nutrition Month.
Gipangunahan kini ni Regional Nutrition Program Coordinator Dr. Niño Archie Labordo pinaagi sa panagtapok kaganinang alas-sais sa buntag sa Guingona Park nga gisundan sa Nutri-Parade paingon sa Provincial Capitol Covered Court.
Tema sa kasa-ulugan karong tuiga ang ‘Sa Philippine Plan of Action for Nutrition kon Sa PPAN Sama-sama sa Nutrisyong Sapat Para sa Lahat’.
Sa iyang pagpamulong, gipadayag ni Department of Heath-Center for Health Development kon DOH-CHD Caraga Regional Director ug Regional Nutrition Committee Dr Cesar Cassion, nga ang nasud nag-atubang sa krisis kung kahimtang sa kahimsog sa panglawas ang hisgutan.
Gani sa pinaka-ulahing datus, 3 sa matag-usa ka gatus ka mga batang nagpangidaron ug 6 anyos paubos, kulang sa timbang ug taas usab ang ihap sa pagkaputot ug kulang sa timbang.
Samtang 1 sa 20 ka mga bata ang anaa sa kategoryang wasted kondiin bisan school age children, duna’y 14% ang obese ug underweight samtang 22% usab sa mga dolescents ang putot ug 13% ang obese kon overweight.
Sa adult population, 40% ang obese/overweight hinungdan nga taas ang risgo nga masakit sa kasing-kasing ug diabetes.
