BUTUAN CITY – Mi-abot sa 500 ka mga mangrove seedlings ang malampusong natanom sa mga membro sa Kapisanan ng mga Brodkaster ng Pilipinas kon KBP-Butuan City/Agusan del Norte chapter kaganinang umaga sa mangrove area sa Brgy. Sacol sa lungsod sa Buenavista, Agusan del Norte.
May kalabutan na kini sa tinuig nga ‘broadcastreeing’ nga maoy brainchild sa national president sa KBP nga si Herman Z. Basbaño kinsa mao usa’y vice president og chief operating officer sa Bombo Radyo Philippines – AM Division.
Sigon ni chapter President Engr. Rommel Zerrudo, target karon sa KBP local chapter nga i-develop ang maong lugar alang na usab sa turismo ilabina nga plano usab sa lokal nga kagamhanan sa maong lungsod nga himuon kining tourist destination og ang pagtabang sa maong tinguha maoy mahatag sa KBP.
Gidugang ni Zerrudo nga inay muhimo og tinuig lang nga kalihukan, mas maayong himuon kining kada-buwan ilabina ang pagpahigayon og meeting sa ingon mahigustan ang mga angayang buhaton.
Aron usab masegurong maayo ang tubo sa ilang gipangtanom, regular kining bisitahon og atimanon sa mga membro.
