BUTUAN CITY – Mi-abot sa 50 ka mga tawo ang patay sa Kenya human nabungkag ang dam tungod sa kusog nga pag-ulan nga miresulta sa lapad nga pagbaha.
Sigon sa usa ka opisyal sa Red Cross, nabanlas sa kusog nga bul-og sa tubig-baha ang mga tawo samtang natulog duol sa Mai Mahiu, kansa 60-kilometros gikan sa capital, Nairobi.
Nagpadayon ang rescue efforts aron makuha ang mga tawo gikan sa kalapukan ug gikabalak-ang musaka pa ang ihap sa mga namatay.
Madumdumang gatusan ka mga tawo usab ang napatay sa baha sa ubang bahin sa Kenya ning mi-aging buwan.
Sa baha ning higayuna, makita ang kalapad sa lapok nga milukat sa kakahuyan ug mibanlas sa kabalayan sa Mai Mahiu.
Gika-ingong daghan usab ang nakamata sa dahunog sa tubig-baha nga miguba sa dam sa ibabaw nga bahin sa suba.
