BUTUAN CITY – Lima ang patay human nagbangga ang duha ka motorsiklo sa may Barangay Road sa Brgy. Crossing Rubber, lungsod sa Tupi, South Cotabato, pasado alas-9:12 kagabii.
Sigon ni Jed Patrick Loreno, Emergency Medical Technician Team Leader sa Tupi, patay ang tanang sakay sa kolor itom nga XRM 125, nga gimanehuan ni alyas “Boy,” 20-anyos ug laborer gikan sa Brgy. Crossing Rubber, duna’y angkas nga si alyas “Darel,” 19-anyos ug alyas “Ikay,” dalaga nga gikan sa Brgy. Cebuano.
Samtang ang kolor itom usab nga Rusi 125, nga gimanehuan ni alyas “Christian,” 20-anyos, gikan sa Brgy. Crossing Rubber, angkas ang 14-anyos nga si alyas “John,” gikan sa Brgy. Bololmala, gikan sa pikas lane ug pag-abot sa dapit nga nahitabuan, nawad-an kini og kontrol ug mitabok sa pikas lane hinungdan sa head-on-collission.
Tungod sa kakusog sa impact, parehong nanglagpot ang duha ka motorsiklo kondiin ang tulo ka sakay sa XRM 125, parehong namatay on-the-spot samtang ang duha nga sakay sa Rusi 125, nadala pa sa ospital apan namatay kaganinang alas-3:30 sa kaadlawon, Lunes, Marso 3.
