BUTUAN CITY – Gi-andam na ang kasong ipasaka batuk sa lima ka indibidwal nga nasikop sa buy bust operation sa niaging alas 12:15 sa sayng buntag sa Riverside, Brgy. Washington, Surigao City kondiin nakuhaan sila og gidudahang shabu nga mukantidad sa 295-mil pesos.
Nasikop sa puwersa sa Philippine Drug Enforcement Agency kon PDEA-Caraga kaabag ang Agusan del Sur Police Provincial Office sila MARLOUIE JAPAY alyas Louie, 27-anyos, olitawo ug ROSSMAN MULCHANDANI alyas RMM 35-anyos, nga parehong taga P-Sunflower, Roxas St., Brgy. Washington, Surigao City.
Samtang si JUAN PATAGAN JR.alyas Totong usa ka Drug Den Maintainer, 47-anyos, olitawo, taga P-Cadena de Amor, Riverside, NIÑO REYNA alyas Niño, 32-anyos, olitawo ug residente sa P-13, Brgy. Mat-i, ug ALMA GABION, 29-anyos, dalaga nga taga P-3, Brgy. San Juan, Surigao City.
Nakumpiska sa maong operasyon ang 11 ka sachet sa gidudahang shabu nga mobalor sa 295-mil pesos ug nagkadaiyang illegal drug paraphernalias.
Ipa-ilalom sa drug test ang mga suspetsado nga kasamtangang gikustodiya sa PDEA-Caraga para sa tukmang disposasyon. (Rolan Janea)
