BUTUAN CITY – Gipahigayon sa probinsyal nga panggamhanan sa lalawigan sa Agusan del Norte ang Basic Tour Guide and Reception Seminar ngadto sa nagkadaiyang mga stakeholders sa tourism industry ning probinsya.
Gibutyag ni Edgar ‘Jun’ Palarca, hepe sa Community Affairs Division sa Provincial Government, nga ang nasangpit nga aktibidad gihimo aron mapalambo ang turismo sa probinsya ilabina nga aduna’y kamandoan ang gobyerno nga temporaryong pagsirado sa Boracay.
Sigon ni Palarca, dili imposibleng madugangan ang mga turista nga mudalikyat ug makabisita dinhi sa probinsya ilabina kadtong mu-adto usab sa isla sa Siargao nga usa kini sa top 10 tourist destinations sa nasud.
Posible matud pa nga adunay spill-over nga epekto kini sa turismo ning lalawigan tungod kay usa ang lalawigan sa mga port of entries kung muadto sa Siargao.
Subay niini, aduna sila’y giplanuhang tour package alang sa mga turista kinsa mu-agi dinhi sa syudad kondiin tawgon k ining ‘Suroy Agusan’.
Tumong niini nga maseguro nga makalibot gyud ang mga turista sa mga tourist destinations dili lang dinhi sa syudad apan lakip na sa mga lugar sa Agusan del Sur ug Agusan del Norte. (Mon Aplaya)
