BUTUAN CITY – Gikumpirma ug gipanganlan sa kadumalahan sa New Peoples Army ang kaubanan niining nakalas sa natigayong bakbakan tali sa kasundalon ug ilang han-ay niadtong Domingo sa hapon sa Brgy Cancavan, Carmen, Surigao del Sur.
Sumala kang Ka Sandara nagpailang tigpamaba sa CCP-NPA, naunhan ang ilang mga kaubanan sa nahitabong engkwentro samtang nga naglung-ag ang mga niini sa ilang paniudto.
Giila ni ka Sandara ang mga casualty nga sila Gealan Jimenez nga taga Prk. 3 Brgy Adlay, Carrascal, Surigao del Sur, Kaye Ballente nga taga Sitio Agsam, Cantilan, Surigao del Sur., Elmer Damian nga taga Brgy. Umalag, San Miguel, Surigao del Sur ug Raul Alacre nga taga San Luis, Agusan del Sur. Apil sa giangkon niini ang narekober nga 4 ka armas, 3 ka AK47 ug 1 ka M16.
Sa pikas bahin giklaro ni Ka Sandara nga si Raul Alacre ug si Ka Meghan managlahi nga persona.
Sigon ni Ka Sandara napugos matod pa nga mo full time sa armadong grupo si Raul Alacre o alyas Ka Aldren human nga gi tag ang pangalan niini sa usa ka high value target nga si Ka Meghan nga anaa sa tarpaulin.
Giklaro ni Sandara nga walay posisyon nga gikuptan sa mga nakalas ug na paabtan na nila ang pamilya sa mga niini.
