BUTUAN CITY – Napasakaan na ug kasong frustrated murder ug illegal possession of firearms ang nadakpang suspetsado sa pagpamusil sa Barangay Kapitan sa Barangay Rizal, Surigao City.
Sigon ni P/Supt. Jay Baybayan, Hepe sa Surigao City Police Station, nasikop ang suspek nga si Rudy Arabis alyas Dodong, 36-anyos nga taga P-10, Barangay Mabini sa maong siyudad, tungod sa hot pursuit operation sa kapulisan.
Natigayon ang pagpusil niadtong Domingo alas 9:30 sa buntag samtang pauli na ang biktimang si Kapitan Severo Del Rosario sa iyang panimalay, kalit nga gibanhigan kini sa 3 ka suspetsado nga nagsakay sa usa ka single motor.
Swerte nalang kay wala nagrabihan ang biktima nga na-igo sa wala nga bahin sa abaga ug anaa karun sa balay tambalanan.
Samtang sa gihimung follow up operation, nasigpatan ang single motor nga gigamit sa mga suspetsado nga miresulta sa pagkasikop sa suspek samtang ang iyang mga kaubanan, padayong pang gipangeta.
Pagbutyag pa ni P/Supt. Baybayan, nga usa sa anggulo nga mitumaw ang away sa yuta partikular na ang pagpaguba ni Kapitan del Rosario sa illegal nga nagtukod nga mga panimalay sa Sitio Bioborjan, Brgy. Rizal.
Una nang gipahibalo ni Mayor Matugas ang paghanyag ug reward nga moabot sa 50-mil pesos kung kinsa kadtong makatudlo o makahatag og sa impormasyon sa suspek ug Mastermind sa pagpusil sa kapitan.
