BUTUAN CITY – Nakumpiska sa mga sakop sa 6th Infantry Division sa Philippine Army ang 33 ka nagkada-iyang klase sa armas sa sunod-sunod nga mga operasyon sulod sa usa ka bulan sa ilang nasakupan nga lugar.
Sumala ni BGen. Edgar Catu, Brigade Commander sa 601st Infantry Brigade, narekober ang maong mga armas gikan sa nagkalain-laing operasyon batok sa mga armadong grupo ug sa gipakusgan nga kampanya kontra sa ilegal nga mga pusil.
Gipahigayon ang mga operasyon sa pipila ka bahin sa Maguindanao del Sur, North Cotabato, ug sa Special Geographic Area sa Bangsamoro Autonomous Region in Muslim Mindanao.
Lakip sa mga nakumpiska ang nagkalain-laing klase sa mga pusil nga taas og kalibre, nga gituohang gigamit sa krimen ug armadong panagbangi sa komunidad.
Matod sa opisyal, kabahin kini sa ilang padayon nga operasyon aron mapakunhod ang pagkatag sa ilegal nga mga armas ug mapadayon ang kalinaw sa rehiyon.
Samtang nanawagan pag-usab ang militar sa publiko nga makigtambayayong sa mga awtoridad pinaagi sa paghatag og impormasyon batok sa presensya sa mga armadong grupo ug ilegal nga mga armas sa ilang lugar.
