BUTUAN CITY – Gihikay na sa Police Regional Office kon PRO-13 uban sa pag-abag sa Department of Social Welfare and Development kon DSWD-Caraga ang pagproseso na sa statement sa 31 ka mga na-rescue nga mga minor-de-edad gikan sa mga rebeldeng grupong Communist Party of the Philippines-New People’s Army kon CPP-NPA.
Sa eksklusibong pakighinabi sa Bombo Radyo Butuan, gipadayag ni PMajor Renel Serrano – information officer sa PRO-13, ang 31 ka mga naluwas nga child warriors nga gilangkuban sa 20 ka mga lalaki og 11 ka mga babaye, gi-recruit sa mga rebelde taliwa nga nag-edad pa lang sila og 12 ngadto sa 17-anyos kansa dakong kalapasan sa International Humanitarian Law.
Pipila kanila gi-train isip medics, intelligence officers samtang ang uban gihimo gyod nga manggugubat ug gipabitbit na og armas. Na-rescue sila sa mga sundalong sakop sa 401st ug 402nd Brigade, Philippine Army atol sa gilusad nga mga operasyon.
Gidugang ni Major Serrano, nakig-alayon na sila sa Women’s and Children’s Protection Desks sa mga hingtungdang police units ning rehiyon uban sa mga local Social Welfare and Development aron hikayon ang affidavit sa tagsa-tagsa ka mga naluwas nga mga bata sa ingon mapasakaan na og kasong kreminal ang CPP-NPA.
Isunod na niini ang pagpasaka usab nila og kaso batuk sa walhong grupo tungod sa ilang paglapas sa International Humanitarian Law.
