BUTUAN CITY – Nagpadayon ang imbestigasyon sa kapulisan sa Rosario, Agusan del Sur kalabot sa natigayong pagpamusil pasado alas-8:40 kagabii nga gikamatay sa usa ka lalaki og gika-angol sa laing duha.
Gi-ila ni P/Sr. Insp. Adren Camu – hepe sa kapulisan sa maong lungsod, ang namatay nga si Arnel Perez, kinsa na-igo sa iyang tangkugo og milapos sa agtang hinungdan sa iyang hinanaling kamatayon samtang ang mga angol mao sila Loloy Perez og Romy Ulidan, parehong residente sa Brgy. Novele.
Nasayrang mitambong matud pa og Christmas party ang tulo og nagdesisyong mag-videoke hinungdan nga misakay sa motorsiklo og pag-abot pa lang sa usa ka videokehan sa Purok 4, Brgy. Poblacion, dinhi na sila gipamusil sa tulo usab ka mga lalaking sakay sa laing motorsiklo kinsa daling nanibat.
Gibutyag ni Insp. Camu nga base sa ilang pakisusi ngadto sa kabanay sa mga biktima, wala matud pa sila’y nasayran nga duna sila’y atraso.
Narekober sa crime scene ang usa ka basiyo sa kalibre 45 nga pistola. (Beth Ruiz)
