BUTUAN CITY – Gibana-banang muabot sa 25,000 ka mga sakop sa transport group nga Samahang Manibela Mananakay ug Nagkaisang Terminal ng Transportasyon kon MANIBELA ang mosalmot sa 3 ka adlaw nga lihok-protesta sugod karong adlawa Lunes, Hunyo 10 ngadto sa 12.
Kini isip pagprotesta batuk sa gihimong pagpangdakop sa mga jeepney drivers nga wala pa nag-consolidate sa ilang prangkisa ubos sa Public Utility Vehicle Modernization Program kon PUVMP.
Sigon ni MANIBELA president Mar Valbuena, sentro sa ilang hunong pasada mao ang National Capital Region diin sila adunay labing menos 25,000 ka mga miyembro.
Ang Makati City ug Mandaluyong City ra ang 2 ka lugar sa Metro Manila ang dili kaayo ma-apektuhan sa ilang protesta ug hunong-pasada.
Lakip sa mga lugar nga musalmot sa ilang hunong pasada ang CALABARZON kon Calamba, Laguna, Batangas, Rizal ug Quezon; Central Luzon, Ilocos Region, ug Cordillera Administrative Region.
Nangayo na daan og dispensa si Valbuena sa mga pasahero nga ma-apektuhan sa ilang transport strike.
