BUTUAN CITY – Mitala na og usa ka patay ang pagkuso-kuso sa bagyong Ada sa Agusan del Norte human nga usa ka batan-ong lalaki ang ang natabunan sa midahiling yuta sa may Sitio Pirada, Brgy Del Pilar sa Cabadbaran City.
Nasayrang wala gipa-ilalom sa storm signal ang maong lalawigan apan apektado kini sa tulo ka adlaw na nga pag-ulan hinungdan nga mihumok na ang yuta sa bukirang bahin sa maong lugar nga miresulta sa pagdahili niini.
Sa eksklusibong pakighinabi sa Bombo Radyo Butuan, gipadayag ni Roselyn Exaure, tigpamaba sa Cabadbaran City government, gi-isa na sa yellow level ang water level sa ilang siyudad timaan nga mangandam na ang katawhan tungod sa pagtaas na sa level sa tubig baha ilabina kadtong mga barangay nga anaa kilid sa suba ug kadtong mga anaa sa low-lying areas ug kadtong prone sa landslide.
Kaganina usab gisuspende na ang klase sa tanang level aron masiguro ang kaluwasan sa mga magtutungha tungod sa paspas nga pagsaka sa tubig sa may Cabadbaran River.
Hinuon naka-preposition na ang tanan nilang mga ahensya nga maghatag og ayuda ug mag-rescue sa mga ma-apektuhang residente.
