BUTUAN CITY – Andam na ang tanan alang sa paglusad sa 2017 Siargao International Women’s Surfing Cup, nga himuon sa sikat nga “Cloud 9” sa General Luna, Siargao Island, lalawigan sa Surigao del Norte sunod buwan.
Ang Siargao Island maoy mag-host sa pinaka-unang World Surf League kon WSL Qualifying Series (QS) women’s event dinhi sa Pilipinas nga himuon sa Mayo 2 ngadto sa 6.
Mabulsa sa mananaog ang 10-mil dolyares kon halos 500-mil pesos gawas pa sa mga consolation prizes nga gi-andam sa kagamhanan alang sa mga babayeng surfers nga gikan sa Indonesia, Thailand, Japan, United States, Australia og Taiwan kinsa makig- compete tali sa mga local talents.
Gila-umang mutambong usab sa maong kalihukan ang mga surfing officials gikan sa Australia og sa Bali, Indonesia.
Gibutyag ni General Luna Mayor Rusillon nga duna sila’y mga maayong surfers sa nasud og sa Siargao nga andam makig-compete ngadto sa mga best surfers sa ubang kanasuran.
Ang maong international surfing event suportado sa probinsyal nga panggamhanan pagpanguna nila Surigao del Norte Governor Sol Matugas, Surigao del Norte Rep. Francisco Matugas II, og ni Department of Tourism-Region 13 Officer-In-Charge Regional Director Mary Jean Camarin. (Beth Ruiz)
