BUTUAN CITY – Tingkagol sa karsel ang duha ka suspetsado nga mipusil-patay sa usa ka security guard sa niaging alas 5:40 sa hapon sa may P-3, San Isidro, Bislig City.
Naila ang mga suspek nga sila Roger Morondos, 40-anyos, menyu, usa ka maguuma nga nagpuyo sa Dampingan, Caramcam District, Mangagoy, Bisig City ug Riel Colis, 29-anyos, olitawo ug residente sa P-7 Sta. Juana, Tagbina, Surigao del Sur.
Ang nasangpit nga mga suspek, parehong miyembro sa Special Regional Security Forces samtang ang biktima nailang si Jojit Madelo, 40-anyos, menyu, Security Guard sa South Capitol ug resident sa P-3, San Isidro, Bislig City.
Sumala pa sa asawa sa biktima nga si Emily Madelo, mitambong matud pa sila ug hearing sa RTC sa kasong LIBEL case diin ang reklamante si kanhe Congressman Enciong Garay.
Sa ilang pagpamauli sakay ang single motor, gisundan matud pa sila itom nga single motor diin dunay duha ka sakay. Kalit matud pang gipusil ang iyang bana sa backrider ug gitawasan pa ang biktima nga natumba na samtang siya midagan ug mitago.
Daling misibat usab ang suspek apan nasikop kini sa gilusad nga hot pursuit operation sa kapulisan ug positibong gitudlo nga maoy responsable sa panghitabo.
