BUTUAN CITY – Gikatakdang buhian karong adlawa sa rebeldeng New People’s Army (NPA) ang gidagit nilang duha ka mga pulis nga sila PO2 John Paul Doverte og PO2 Alfredo Degamon Jr.
Sigon ni Ka Otto – nagpa-ilang tigpamaba sa Guerrilla Front Committee 16 sa NPA, kini human nasabutan sa gihimong negosasyon sa third party facilitator og sa militar ang pagpaatuman sa 2 days before og 2 days after nga stand down kon hunong-operasyon sa han-ay sa AFP og sa PNP.
Ipatuman matud pa kini sa mga lungsod sa Claver, Gigaquit, Bacuag og Placer sa lalawigan sa Surigao del Norte. Hinungdan nga naglaum ang ilang han-ay nga ihunong na ang combat operation sa AFP og PNP.
Apan gitin-aw ni Brig. Gen. Nemesio Gacal – commanding officer sa 402nd infantry Brigade, Philippine Army, wala’y mahitabong stand down kon hunong operasyong militar sa maong mga lungsod tungod kay padayon ang ilang operasyon subay na sa direktiba ni Pangulong Rodrigo Duterte nga pahugtan ang ilang combat operation batuk sa mga rebeldeng terorista.
Gitambagan usab ni Gen. Gacal ang mga sibilyan og mga media practitioners nga dili una mutambong pa sa mga kalihukan sa NPA tungod kay posible matud pang mahitabong engkwentro karong nagpadayon ang ilang combat operation. (Beth Ruiz)
