BOMBO BUTUAN – Sa pagkutlo ning balita, duha na ang nakalas human natigayon ang panagbangga sa ten wheelers ug pampasaherong multicab kaganinang alas 12:47 sa sayung kaudtuhon sa may Purok-1, Barangay Sumilihon, ning siyudad sa Butuan.
Ang usa sa mga namatay, ang nailang si Princess Cawaling samtang wala pa maila ang usa samtang dunay duha nga kritikal ang kahimtang ug laing pito ang samaran.
Nasayrang gikan sa may Taguibo ug padulong unta sa Surigao City ang ten wheelers aron magluha ug mga basyo sa ilimnon sa dihang kalit matud pa nga mibuto ang ligid niini hinungdan sa pagkasarasay ug pagbangga sa multicab nga gikan sa Cabadbaran City ug padulong ning siyudad, adiser kini mibangga sa punuan sa kahoy.
Tungod sa kakusog sa panag-bangga, hilabihan pagkalumping sa multicab nga nagtangag sa plaka numero ACU 7858 nga gimanehuan ni Seth June Aballar, 32-anyos, menyo, residente sa Purok-2, Barangay Sumilihon nga atua gidala karun sa Butuan City Medical Center.
Samtang guba usab ang unahang bahin sa ten wheeler tungod sa pagbangga niini sa punuan sa lubi. Sa eksklusibong pakighinabi sa driver niini nga si Bediano Pacibot nga taga Villa-Kananga, gibutyag niining kalit nalang nga misarasay ang iyang gi-drayban hinungdang wala na siya kabantay nga duna siyang nabanggaan nga multicab adiser mibangga sa punuan.
Gane sa pakighinabi sa drayber, naipit pa ang iyang tiil sa manobela kauban ang iyang pahinante. Hinoon nakuha sila sa mga rescuer nga taga-Bureau of Fire Protection kon BFP-Butuan ug nadala na usab sa balay tambalanan.
