BUTUAN CITY – Padayon pang gisuta sa kapulisan sa Butuan City Police Station kon BCPS2 ang hinungdan sa kamatayon sa duha ka mga lalaking senior citizens kinsa napalgan na lang nga wala na’y kinabuhi kaganinang sayo sa buntag sa managlahing barangay ning siyudad.
Unang napalgan ang wala na’y kinabuhing si alyas Islaw pasado alas-sais sa nbuntag samtang naghigda sa iyang payag sa may Purok 7, Brgy. Ong Yiu nga nakatunob pa sa yuta ang duha niini ka mga tiil.
Sa eksklusibong interview sa Bombo Radyo Butuan, gipadayag ni Ismael Condar nga alas-tres pa lang sa kaadlawon kaganina, nakadungog na matud pa ang mga silingan sa biktima nga naghilak kini og posibleng tungod kini sa kagutom o kaha duna kini gihambing balatian ilabina nga matulog kini kanunay nga matukod sa yuta ang iyang mga tiil tungod sa kagamay lang sa iyang payag.
Paglabay og usa ka oras, napalgan na usab nga wala na’y kinabuhi sulod gihapon sa iyang payag si Edgardo Tejano Sr., 77-anyos sa may Purok 1, Brgy. Holy Redeemer ning siyudad.
Sigon sa iyang higalang si Herman Villago, gikan pa sa kauluhang Manila ang biktima nga mi-abot sa lugar nga iyang napatyan niadtong Oktubre ning mi-aging tuig aron pangitaon matud pa ang iyang mga kabanay ilabina sa iyang mga igsoon nga nasutang patay na.
Nasayran nilang sa condo unit kini nagpuyo didto sa kauluhan apan nagpuyo lang nga yano dinhi sa Butuan ug wala pa misugot dihang gipetisyunan sa iyang asawang green card holder na sa Amerika.
Nagsalig lang matud pa kini sa iyang pensyon ug sa ipadala sa iyang mga anak.
