BUTUAN CITY – Natala sa siyudad sa Butuan ang unang pagpamusil-patay sa tuig 2017 diin duha ang biktima kaganinang 12:45 sa buntag sa may Purok-8, Barangay Pagatpatan.
Nailhan ang mga biktima nga sila Darwin Gravino, menyu nga taga Purok-1, Barangay Buhangin, Butuan City ug Redemtor Genon, menyo ug residente sa Barangay Amontay, lungsod sa Nasipit, Agusan Del Norte nga parehong mga electrician nga nadestino sa usa ka mall ning siyudad.
Sigon ni PO3 Jenious Sab-a, sa Butuan City Police Station-2, nag-atang lang ug masakyan ang mga biktima nga pauli na gikan sa vigil sa igsoon sa ilang kaubanan sa dihang kalit nga gipusil-pusil sa wala pa mailhang suspetsado nga nagsakay ug single motor.
Nakuha sa crime scene ang 3 ka basyu sa gitoohan .45 nga pistola.
Sa karun, padayon pang gigukod ang suspek samtang gisuta usab ang motibo sa pagpamusil ug kon duna ba kini kalambigitan sa illegal drugs.
Sa pakighinabi ning sibyahan kang Romel Gravino, igsoon sa biktimang si Darwin Gravino, gibutyag niining kumbinsido siya nga wala nag-apil-apil sa illegal drugs ang biktima tungod kay gina-drug test man kini diha sa kompaniya nga iyang gitrabahuan gawas pa sa iyang pagkatalawan.
Sa kasamtangan, wala pa siya’y mahuna-hunaan nga posibling motibo sa pagpamusil sa iyang igsoon.(rolan)
