BUTUAN CITY – Nabutang sa peligro ang kinabuhi sa usa ka 17-anyos nga bayong-bayong nga si alyas ‘Lito’ sa Dumaguete City, Negros Oriental human niini gi-irok ang bugas nga mitubo sa iyang ilong.
Saysay sa inahan niini, natandugan matud pa ang bugas ug dinhi na nagsugod paghubag ug nag-nana rason nga gi-irok kiini sa iyang anak aron mugawas ang dugo ug nana.
Dinhi na nagsugod og sakit ang ulo ni Lito ug namatikdan pa nga nalain ang kolor sa iyang ilong apan dihang wala na kini madutli sa gi-inom nga tambal, nagdesisyon ang inahan nga dalhon na kini sa ospital apan wala pa gani sila maka-abot sa emergency room, nalipong na kini, nawad-an og panimuot ug mikirig.
Sigon sa dermatologist, talagsaon lang kining mahitabo apan posibleng ikamatay sa pasyente ang pag-irok sa bugas nga mitubo sa “danger zone” kon “triangle of death” sa nawong.
Kung mukaylap matud pa ang impeksyon sa “triangle” tungod sa pag-irok sa bugas, daling mu-abbot ang impeksyon sa utok sa tawo nga posible niyang ikamatay.
Apan tungod kay nadali kini, anaa na siya sa luwas nga kahimtang ug maayo na ang iyang paminaw sa lawas samtang padayong nagpa-ayo.
