BUTUAN CITY – Dili mo-ubos sa 15 ka mga tawo ang patay sa pag-atake sa mga drones sa Russia nga kaduha mi-igo sa usa ka shopping center sa siyudad sa Kryvyi Rih, sa sentrong bahin sa Ukraine, samtang laing 130 lakip ang 23 ka bata, ang angol.
Aduna usa’y mga tawo nga gikatahong natanggong ilawom sa mga natagak nga mga debris.
Makita sa footage ang ikaduhang drone nga mi-igo sa shopping center nga nagdilaab na niadtong higayona sa Dnipropetrovsk region ug sa pagkutlo niini nga balita, wala pa magpagawas og komento ang militar sa Russia kabahin niini nga insidente.
Sigon ni Dnipropetrovsk regional head Oleksandr Hanzha, sa 130 ka mga angol, 29 niini ang anaa sa seryosong kondisyon ug gikabalak-an sa mga awtoridad nga posible pang mosaka ang ihap sa mga namatay.
Gipadali usab ang pagpadala sa mga rescue teams gikan sa upat ka ubang rehiyon sa Ukraine aron motabang sa pagpangita ug pagluwas sa mga posibleng buhi pa nga natanggong sa mga natumpag nga parte sa mall.
