BUTUAN CITY – Mi-abot sa 14 ka mga tropa sa kagamhanan nga gilangkuban sa duha ka mga regular nga sundalo og 12 ka mga CAFGU members ang nadagit sa mga rebeldeng New People’s Army kon NPA.
Kini human ang malampuson nilang wala’y buto nga pag-raid sa CAFGU detachment kaganinang kaadlawon sa Brgy. New Tubigon, lungsod sa Sibagat, Agusan del Sur.
Sigon ni Ka Sandara, nagpa-ilang tigpamaba sa Northeastern Mindanao Region kon NEMR sa NPA, ang ilang mga ka-ubanan sa Guerilla Front 21 ang responsable sa maong pag-raid.
Tungod kay wala’y buto nga nahitabo kumpirmadong wala’y na-angol sa duha ka panig apan ilang nadala ang kapin matud pa sa 20 ka mga high powered firearms apil na niini ang M203 og machine gun.
Samtang gikumpirma usab ni Major General Roland Villanueva- commanding general sa 4th Infantry ‘Diamond’ Division, Philippine Army, ang bloodless og wala’y buto nga pag-raid sa NPA sa CAFGU detachment nga nakabase sa Brgy. New Tubigon, lungsod sa Sibagat, Agusan del Sur.
Sa eksklusibong pakighinabi sa Bombo Radyo, gipadayag sa opisyal nga padayon pa nilang gi-consolidate ang ihap og klase sa mga armas nga nadala sa grupo human ang ilang operasyon kaganinang kaadlawon.
Sa inisyal nga impormasyong naka-abot sa iyang buhatan, gipadayag niining apil sa nadala sa mga rebelde ang mga M16 armalite rifles, R4 rifles, M14 armalite rifles og M203.
Gikondena usab sa opisyal ang gihimo sa mga rebelde tungod kay klaro na matud pa ang dautan nilang intension sa pagdeklara og unilateral ceasefire aron ang makadikit sa instalasyon sa kagamhanan.
Ang gihimo matud pa sa mga rebelde, klarong pagpamakak sa katawhang Filipino
