BUTUAN CITY- Gikumpirma ni Dr. Sadaila Raki-in, ang Assistant Regional Director sa Department of Health kon DOH-Caraga nga siento porsyento na nga nagamit ang 130-mil ka mga doses sa Janssen vaccines nga gi-alokar ning rehiyon.
Sumala sa opisyal, muabot sa 137,130 ka mga indibidwal ang nakadawat sa Janssen nga bakuna sa nagkadaiyang bahin sa rehiyon kon 100.18 porsyento sa gihatag nga alokasyon.
Gibutyag usab niini nga matag bakuna, dunay mo-sobra nga vials sa Janssen hinungdan nga milapas sa 1,005 ang ihap sa mga nabakunahan na og gihurot na lamang ang suplay ngadto sa mga hilit nga lugar nga nagkinahanglan og bakuna.
Gani hangtod karun, prayuridad gihapon sa pagbakunabakuna mao kadtong nalakip sa A2 kon (senior citizens) ug A3 kon (person’s with comorbidities) priority groups samtang nagpahigayon usab og pagpamakuna sa mga hilit nga lugar sa rehiyon nga lisud maadto-an sa vaccination teams sama sa A3, A4 (economic front liners sama sa trabahante sa gobyerno ug pribadong institusyon ug A5 priority groups kon (Indigent nga residente).
Tungod niini padayong paningkamotan ning rehiyon ilabina ning dakbayan sa butuan nga mabakunahan ang kutob sa mga magpabakuna aron sa ingun nga makab-ot na ang 70% nga herd immunity.
Gani mihangyo usab ang tanang LGU’s sa rehiyon nga kinahanglan matud pa nga siguraduhon nga anaa sa tagsa-tagsa ka mga Quarantine facilities ang mga nagpositibo sa COVID-19 dungan sa pagpakusog sa contact tracing program sa matag lungsod o syudad sa rehiyon aron gilayon nga masumpo ang virus ilabina ang pagbabag sa pagsulod sa Delta variant ning rehiyon.
