BUTUAN CITY – Mapasigarbuhon ang pamilya Sarmiento human mi-qualify sa gipahigayong audition alang sa Jr. NBA National Training Camp karong umaabot nga buwan sa Mayo ngadto sa kaulohang Manila si John Michael Sarmiento, magtutungha sa Father Saturnino Urios University ning dakbayan sa Butuan uban ang laing 6 ka mga entrante.
Sa pakighinabi sa Bombo Radyo Butuan kang Jean Ferrer Sarmiento, inahan ni John Michael, malipayon niining gisaysay ang iyang pagkuyog sa iyang anak sa pagsalmot niini sa qualifying audition ning nakalabay’ng simana.
Sigon ni Ginang Sarmiento wala niya damha nga sa liboang mga entrante gikan sa nagkadaing bahin sa Mindanao ug Kabisay-an, usa ang iyang anak nga makuha.
Gibutyag niini nga sukad pa niadtong 4 anyos pa ang iyang anak nakita na niya ang interes niini sa basketball, diin kanunay matod pang ikuyog sa amahan niini kung dunay salmotan nga torneyo. (Rolan Janea)
