BUTUAN CITY – Mi-abot sa 111 ka mga pulis ning rehiyon sa Caraga ang swerteng naka-angkon ug housing units gikan sa Pabahay Program sa gobyerno kagahapong adlawa.
Sa pakighinabi ning sibyahan, gibutyag ni P/Chief Insp. Rennel Serrano, regional information officer sa Police Regional Office kon PRO 13, kini na ang ikaduhang hugna sa pagpang-apod apod og mga balay sa kapulisan ning rehiyon tungod kay niadtong tuig 2015 naka-avail usab ang PNP Caraga sa housing project sa gobyerno nga nahimutang sa Brgy. Tiniwisan, ning syudad sa Butuan.
Kagahapong adlawa, lain na usab nga hugna sa awarding nga gipaagi sa pa-raffle ang gipahigayon kungdiin muabot sa 111 ang nakaangkon ug housing unit gikan sa 279 nga gidaghanon sa mga aplikante nga buot makabaton niini nga nahimutang didto sa Brgy. Mabini, syudad sa Surigao.
Kasagari sa mga nakadawat taga- Surigao City ug Surigao del Norte Area ra usab apan abli sa tanan ang nasangpit nga pabahay ilabi na ngadto sa mga PNP personnel dinhi sa rehiyon nga wala pa naka-avail sa mga nakalabay’ng housing projects.
Dugang pa niini, nga ang matag housing unit ang nagkantidad matud pa ug 240-mil pesos nga mamahimong mabayaran in-cash o ba kaha installment sulod sa 10 ka tuig . (Mon Aplaya)
