BUTUAN CITY – Posibleng mu-abot sa 10-mil ka mga debotong Katoliko ang mulambigit sa Panaad 2017 dinhi sa dakbayan sa Butuan karong Abril 14, adlaw’ng Biernes aron mu-apil sa station of the cross nga himuon sa Brgy. Anticala ning siyudad.
Sa pakighinabi ning sibyahan, gipadayag sa usa sa mga organizers sa maong kalihukan nga si Teodoro Gabriel Salcedo nga nakig-alayon na sila sa kapulisan alang usab sa seguridad sa tanan.
Lakip sa iyang gidili sa kababayen-an mao ang pagsuot og high heels og ang dili pagdala og backpack aron maseguro ang seguridad sa tanan.
Giklaro usab niini nga duna’y kasakyan ang mga debotong mu-avail sa libreng sakay padulong sa Panaad site ilabina niadtong diha manukad sa Guingona Park, apil na tungod sa overpass sa Brgy. Libertad og anaa pay tungod sa Rotonda sa Brgy. Ampayon.
Gibutyag sa opisyal nga aron han-ay ang paghatud sa mga deboto ngadto sa Brgy. Anticala, kinahanglang alas-tres pa lang sa kaadlawon, didto na sila sa convergence area sa maong mga lugar tungod kay base sa programa, sugdan gilayon ang station of the cross pasado na sa alas-3:45 sa kaadlawon aron maka-abot na sila sa ubos nga bahin sa alas-otso sa buntag.
Gidugang niini nga bisan og wala’y nadawat nga hulga sa seguridad sa maong lugar ang mga otoridad, apan mag-deploy gihapon sila og mga pulis. Nasayran nga samtang nagkadugay sukad nagsugod ang Panaad niadtong tuig 2007, nagkadaghan usab ang mga debotong mi-apil niini.
Kini taliwa pa man nga duna’y usa ka higayon nga gilawgaw kini sa armadong mga lalaki nga mikalas og duha ka kinabuhi. (Beth Ruiz)
