BUTUAN CITY – Gikatakdang palamboon sa Department of Tourism kon DOT kauban ang lokal nga kagamhanan ang 10 ka suba sa Caraga aron mahimong eco-tourism sites ug mapromotar ang inclusive growth sa kumunidad nga anaa sa maong suba.
Ang plano namugna human sa natigayong panagpulong sa mga tourism officers gikan sa 5 ka probinsiya ug 6 ka siyudad nga gipangunahan sa technical working group sa DOT-13 sa panguna ni Officer-In-Charge Mary Jean A. Camarin.
Gitapos sa tourism officers ang plano alang sa 10 ka suba pinaagi sa agency’s 2017 Ilog Program: “Ilog Tourism–Inclusive Local Growth through River Tourism.”
Ang maong mga suba mao ang musunod:: Agusan River (Butuan City), Kalinawan River (Jabonga, Agusan del Norte), Cabadbaran River (Cabadbaran City), Gaas Inlet (Dinagat Island), Sabang Gibong River (Agusan del Sur), Surigao River (Surigao City), Baoy River (Gigaquit, Surigao del Norte), Tandag River (Tandag City), Abacanan River (Cantilan, Surigao del Sur) ug Giasan River (Magallanes, Agusan del Norte).
Sigon ni Kylee Doreene Q. Plaza, DOT-Caraga Tourism Officer, ang maong programa makamugna ug katrabahoan sa mga residente, gawas pa sa mahatag nga torismo.
Ang maong ahensiya nagtagana ug 600-mil pesos alang sa unang hugna sa pagpalambu sa 10 ka suba sa Caraga.
