BUTUAN CITY – Padayon ang paglusad sa Philippine Coast Guard (PCG) og search and rescue operations human ang pagtikla-ob sa Chinese motor vessel nga Hong Hai 16 sa kadagatan sa Barangay Malawaan, Rizal sa Occidental Mindoro kagahapon, Abril 15.
Gi-deploy sa maong lugar ang response group sa Coast Guard Sub-station San Jose, Special Operations Unit, ug sa Marine Environmental Protection Enforcement Response Group aron pangitaon ang 10 nga nawalang tripolante sa maong barko.
Nasayrang sa maong ihap, 7 niini ang mga Pilipino samtang 3 usab ang mga Intsik. Una nang naluwas ang 14 ka mga crew members niini apil na ang 6 ka mga Pilipino ug 8 Chinese nationals samtang namatay usab ang usa ka Chinese.
Gawas sa search and rescue operations, naglusad na usab og underwater assessments ug nangandam na alang sa himuong diving operations ug cutting work ang Coast Guard Special Operations Group Southern Tagalog.
Base sa initial assessment, nagpabiling upright ang barko apan partial kining na-uslob rason nga posibleng na-trap ang mga tripolante sa may engine room.
Alang usab sa posibleng environmental hazard sa insidente, nakig-alayon na ang PCG sa Provincial Disaster Risk Reduction and Management Office aron anaa gilayon sila higayong kinahanglang magbutang og oil spill containment boom.
