BUTUAN CITY – Anaa na sa kostudiya sa Municipal Police Station sa Trento, lalawigan sa Agusan del Sur ang driver sa trak human niini gidumbol ang motorsiklong duna’y sakay nga tulo ka mga tawo nga miresulta sa pagkamatay sa driver niini og pagka-angol sa iyang duha ka mga angkas.
Gi-ila ni PO2 Mark Dennis Sarsaba ang namatay nga si Rene Loro, 26-anyos, ulitawo samtang padayon pang gitambalan ang iyang mga angkas nga sila Jeric Timblaco, 19 anyos og Bernardo Palmes Jr. 17 anyos parehong estudyante og residente sa Purok 18, Sitio Nahalinan, Brgy. Angas, Sta. Josefa sa susamang lalawigan.
Anaa na usab sa kostudiya sa maong police station ang driver sa trak nga si Peter Repolidon, 62-anyos, minyo og residente sa Brgy. Poblacion, lungsod sa Pikit, North Cotabato.
Nasayrang gikan pa sa Davao City ang trak og pasulod na unta sa public market sa Trento apan paghidangat niini sa national highway sa P-6 Brgy. Poblacion pasado ala-1:43 kagahapon sa kaadlawon, midumbol niini ang motorsiklong gisakyan sa naka-inom na matud pang mga biktima.
Tungod sa kakusog sa impact, naka-angkon og mga bun-og og samad sa kalawasan ang mga biktima hinungdan sa maong casualty. (Beth Ruiz)
