BUTUAN CITY – Hangtud sa pagkutlo niini nga balita, wala pa gihapon mapalgi sa mga otoridad apil na sa mga kabanay ang usa ka 61-anyos nga lolo nga na-anod sa Gibong River ning mi-aging adlaw pa dihang misulay kini pagtabok.
Naila ang biktimang si Joesipito Armodia, mulupyo sa Brgy. Buenaswerto sakop sa maong lungsod. Nasayrang mitabok matud pa sa maong suba ang biktima pasado alas-otso niadtong Huwebes sa buntag apan na-anod kini og wala na makatunga pa.
Samtang Kasubo ang gibati sa pamilya Verano human namatay ang ilang 16-anyos nga anak dihang mitikla-ob sa Agusan River ang gidala niining bangka ning mi-aging adlaw atol sa pagbundak sa wala’y hunong nga ulan.
Naila ang biktimang si Melvoy Verano, residente sa Brgy. Maharlika, lungsod sa Talacogon, lalawigan sa Agusan del Sur. Nasayrang ka-uban sa biktima ang laing duha ka mga bata kinsa daling naluwas human ang insidente apan wala na madali pa si Verano. (Beth Ruiz)
