BUTUAN CITY – Alayon sa kamanduan ni Pangulong Ferdinand Marcos Jr. para sa “full government support”, pormal nang giaprubahan sa Sangguniang Panlalawigan sa Albay ang usa ka resolusyon nga nagdeklara og state of calamity sa mga siyudad sa Legazpi, Tabaco, ug Ligao, apil ang mga lungsod sa Camalig, Malilipot, Sto. Domingo, Daraga, ug Guinobatan aron masiguro ang paspas nga pagpaabot og serbisyo publiko taliwa sa pag-alburuto sa Bulkang Mayon.
Sumala sa taho sa Albay Public Information Office, ang nasangpit nga lakang gihimo human matala ang mga serye sa lava flow collapse-fed pyroclastic density current niadtong May 2 ug May 5, 2026 nga naghatud og baga nga ashfall sa kapin 80 ka barangay rasong gisugyot ni Committee on Crisis and Emergency Management Chairperson Milagros Bal ang nasangpit nga administratibong kamanduan para sa proteksyon sa mga residente.
Pinaagi sa nasangpit nga deklarasyon, makabaton og legal nga awtoridad ang mga apektadong lokal nga kagamhanan nga gamiton ang ilang calamity funds para sa relief operations, evacuation, ug rehabilitasyon, samtang nagpabiling prayoridad sa gobyerno ang hugot nga pagpatuman sa mga safety protocols ug koordinasyon sa mga awtoridad aron maseguro ang zero casualty sa tibok lalawigan.
