BUTUAN CITY– Pinakabag-ong survey nga gipagawas sa OCTA Research, mipakita nga ang sweldo mao gihapon ang numero uno nga kabalaka sa mga Pilipino sa tibuok nasod.
Sumala ni Atty. Sonny Matula, presidente sa Federation of Free Workers, nga prioridad karon sa mga mamumuo ang usbaw sa minimum wage ug lig-on nila nga ipadayon ang panawagan alang sa ₱200 wage increase.
Sigon pa ni Matula, nga ang maong panukala nga gisang-at sa 19th Congress sa miaging tuig napundo human maabtan sa deadline ug wala mapasar, apan padayon gihapon matud pa nila kini i-duso ngadto sa House of Representatives ug sa Senado aron mahimong konkreto nga aksyon sa kagamhanan pinaagi sa legislation.
Gani, nakigbisog ug gihisgutan pagbalik usab kini ni Trade Union Congress of the Philippines kon TUCP Partylist Congressman Raymond Democrito Mendoza, ang balaodnon sa House of Representatives, ug sa laing usa pa ka senador nga nag-file og panukala nga naglatid og ₱300 wage increase.
Dugang pa sa Presidente sa FFW, nga gikinahanglan na gyud nga madugangan ang sweldo sa mga mamumuo tungod sa padayon nga pagsaka sa presyo sa mga palaliton nga dili na maabot sa kasamtangang kita sa mga trabahante, kansa nagpasakit sa kahimtang sa daghang pamilya nga napugos magpa-cash advance o iprenda ang umalaabot nga suweldo aron lang makakaon.
Sigon pa ni Matula, nga samtang ang pipila ka unyon nagapaningkamot sa Collective Bargaining Negotiation sulod sa mga kompanya, limitado ra kini ug dili makahatag og lapad nga benepisyo sa tanan, busa gikinahanglan ang aksyon sa gobyerno aron mapasaka ang regular wage sa mga mamumuo.
Gibutyag usab niini, nga sukad sa pagsugod sa administrasyon ni President Ferdinand Marcos Jr. wala pa kini makigkita sa mga lider sa Obrero, diin nagpasabot sa kakulang sa direktang pakig-uban sa labor sector.
Taliwala sa paningkamot sa mga Pilipino, nagpabilin gihapon ang kalisod tungod sa korapsyon ug political dynasty nga nagdominar sa gobyerno, hinungdan nga gipanawagan ang pagpasa sa dugay nang giingon sa konstitusyon nga Anti-Dynasty Law pinaagi sa Kongreso ugaling dili matud pa kini ma-aprobaran adunay posibilidad nga gamiton ang people’s initiative aron mapatuman ang reporma nga dugay nang gihuwat sa katawhan.
