BUTUAN CITY – Dakong garbo alang ning siyudad sa Butuan human nasakmit ni Zhaoyu Capilitan gikan sa Barangay San Vicente, ang gold medal sa dulang chess sa 960 blitz category sa nagpadayong Batang Pinoy 2025 National Championships sa General Santos City ubos sa pagdumala ni chief arbiter John Eric Abaro.
Ang chess 960 Blitz usa ka porma sa chess nga naghatag ug mas dako nga challenge sa mga players tungod sa random nga piece arrangement, nga nagkinahanglan ug mas lawom nga analysis ug adaptability.
Ang kadaugan ni Zhaoyu nagpamatuod sa iyang kamaayo, taktika, talento ug determinasyon sa maong event nga naghatag og dungog dili lang alang sa iyang pamilya kondili apil na sa entiro dakbayan sa Butuan ug Caraga Region.
Samtang ang delegasyon sa dakbayan sa Butuan ubos sa Department of Education kon DepEdCaraga, duna na’y lima ka mga gold medals. Duha niini gikan sa dulang arnis nga nakuha nila Airielle Ashley Lape ug Charlagne Jean Luna, ug tag-usa sa muay thai pinaagi ni John Rashiel Arcite; Karate-do ni Kyle Gio Rosales; Miguel Rey Bicar sa Taekwando. Gawas sa gold, duna na usa’y upat ka silver ug unom ka bronze medals ang mga delegado sa Butuan City.
