BUTUAN CITY – Mikunhod pag-usab ang kaso sa dengue dinhi sa Caraga Region, base na sa pagkumpirma sa Department of Health-Center for Health Development kon DOH-CHD Caraga.
Base sa datos as of Agusto 8, natala ang 2,303 ka mga kaso kansa mas ubos og 66% kung itandi sa ni-aging tuig sa susamang period nga anaa sa 6,822 ka mga kaso.
Sa lima ka mga probinsya, ang Agusan del Sur ang dunay labing taas nga kaso nga mi-abot sa 674, gisundan sa Surigao del Sur – 431, Surigao del Norte – 280, Agusan del Norte – 106, ug Province of Dinagat Islands – 100.
Samtang sa mga syudad, pinakataas ang Butuan nga naay 214 ka mga kaso nga, gisundan sa Tandag – 139, Bayugan -129, Surigao – 104, Cabadbaran – 67, ug Bislig nga dunay 59 ka mga kaso.
Sigon ni Dr. Amethyst Alicante, Medical Officer IV sa DOH Caraga, target nila nga mahimong zero ang dengue case sa rehiyon rason nga padayon ang ilang pag-promote sa 4-S, ingon man 4-Ts strategy nga mao ang Taob, Taktak, Tuyo ug Takip; ug uban pang estratehiya sa pagkontrol sa lamok.
