BUTUAN CITY – Makadismaya ang gipakitang bangi ug binagga-ay sa mga tag-as nga opisyal sa nasud kalabot sa kontrobersyal nga claim sa nasud sa West Philippine Sea.
Sa eksklusibong pakighinabi sa Bombo Radyo Philippines, gipadayag ni Atty Michael Henry Yusingco nga ang nasaksihan karon sa kadaghanang mga Pinoy sa managlahing baruganan sa mga tag-as nga opisyal sa gobyerno, naghatag og nosyon nga hayan ingon na lang niini ang mahitabo ilabina nga gisakyan na usab kini sa China.
Pinakamaayo gihapon matud pa nga himuon ang diplomatikong dayalogo ilabina nga wala’y kakapas ang Pilipinas nga agbatan ang higanteng nasud sa bisan asa nga natad ilabina sa armaments.
Kini nga kahuyangon, makita matud pa dihang gipapasar sa Pilipinas ning mi-aging tuiga ang Self-Reliant Policing Law aron duna’y paagi nga pakusgon ang kakapas nga depensahan ang kakapas sa nasud pagpanalipod sa katungod, kadagatan, teritoryo ug sobereniya.
Ang kinahanglan matud pang himuon karon sa kagamhanan mao ang pag-review kung napatuman ba ang baruganan nga resolbahon ang maong isyu pinaagi sa mga diplomatic strategies, processed ug protocols.
Apan imposible gihapon kining mahitabo kung magkabahin-bahin ang mga Pilipino ilabina ang atong mga tag-as nga opisyal.
