BUTUAN CITY – Nabutang karon sa kontrobersiya ang kamulo pang gitrabaho nga flood control structure sa may Kinabutan River sakop sa Villa Carito, Purok Kalipayan, Brgy Washington, Surigao City taliwa nga na-report na sa Department of Public Works and Highways kon DPWH-Surigao del Norte 2nd District Engineering Office nga completed niadtong Pebrero 26, 2024.
Ang nasangpit nga proyekto, gitrabaho sa Monolithic Construction and Concrete Products Inc. kansa usa ka regular infrastructure project nga gipunduhan sa General Appropriations Act kon GAA 2024 00-2.
Apan dihang gi-inspeksyon ang project site kagahapon, nasuta nga wala kini sheet piles nga mao unta’y maghatag og structural support, nga maoy gikinahanglan sa mga excavation ug earth retention projects.
Makita nga ang mga kabilya, igo ra gipangtusok sa yuta kansa makonsiderang gimantiniran ra kini sa pagtrabaho.
Bukas ang Bombo Radyo Butuan, pagpaminaw sa panig sa hingtungdang ahensya aron maklaruhan sa dagan sa maong proyekto nga klarong gidali-dali ilabina nga padayon ang inspeksyon karon ni DPWH Sec Vince Dizon sa susamang mga proyekto kansa nabulabog nga maoy tuburan sa lapad nga kurapsyon sa maong ahensya nga gilambigitan sa mga magbabalaud ug sa mismong contractors.
