BUTUAN CITY – Subling nadakpan sa kapulisan sa Surigao City ang naka-ikyas nga mahuyang nga gitu-uhang nagpayuhot og ilegal nga druga nga gi-ilang si John Mathew Fajelago, alyas Althea, residente sa Siargao Islands, lungsod sa General Luna, Surigao del Norte.
Ang suspek nadakpan sa Sarvida Street, Barangay Taft, Surigao City pinaagi sa manhunt operation nga gipahigayon kagahapon sa hapon human mi-ikyas gikan sa ilang mga kamot dihang kini nananghid nga mangihi.
Nasayrang dalhon unta ang suspetsado uban sa laing usa ngadto sa korte aron kasuhan pinaagi sa inquest proceedings. Apan pag-abot nila sa Eva Macapagal Terminal padulong sa Brgy. Canlanipa, mihunong sila sa Purok 9, Sitio Cayutan, Barangay Cagniog ug dinhi na nananghid ang suspek nga mangihi apan misibat kini.
Sumala ni PLT. COL. Mariano Lukban, Hepe sa Surigao City Police Station, daling gilusad ang manhunt operation nga miresulta usab sa subling pagkasikop niini.
Dugang sa maong hepe, mi-ikyas ang maong indibidwal tungod sa baruganan niining wala matud pa siya’y sala. Kini taliwa sa kasayurang nag-atubang siya og kasong paglapas sa Republic Act 9165 kon mas nailang Dangerous Drugs Act of 2002.
