BUTUAN CITY-Padayon pang gipakisayran sa mga otoridad ang motibo sa natigayong pagpusil-patay kagahapon sa hapon sa Purok 5A, Sitio Tagulahi, Brgy. Antongalon, ning syudad sa Butuan.
Naila ang biktimang si Edwin Dela Cruz Salundaguit, 49 anyos, menyu, watchman sa Equiparco Construction Corporation ug residente sa naasoy nga lugar samtang padayon pang gi-ila sa mga otoridad ang responsable.
Sumala pa, dihang mikana-og na ang biktima sa gisakyan niining motorsiklo pagtungod mismo sa iyang panimalay kalit nga miduol ang suspetsado dayon pusil sa biktima sa makadaghang higayon nga miresulta sa iyang hinanaling kamatayon.
Mibiya gilayon ang suspek human sa maong hitabo.
Kini na ang ikaduhang higayon nga gipusil-patay ang mga empleyado sa maong construction company kondiin una niini, natigayon sa Brgy. Anticala ning siyudad nga gi-angkon sa mga rebeldeng NPA nga ilang gisilutan.
