BUTUAN CITY – Wala’y Filipino nga nadamay sa linog nga mikalas og kapin na sa usa ka libo ka kinabuhi sa Khost City nga sakop sa eastern Paktika province, base na sa pagkumpima ni Bombo international correspondent Joel Tungal direkta gikan sa Afghanistan.
Sa eksklusibong pakighinabi sa Bombo Radyo Butuan, gipadayag ni Tungal nga kini tungod kay ang mga Pinoy nga atua sa maong nasud, didto man nagpuyo sa mga dagkong siyudad sama sa capital Kabul, Mazar, ug sa ilang lugar sa Jalalabad.
Sa pag-asuy ni Tungal, gibutyag niining nabati usab nila sa Jalalabad ang magnitude 6.1 nga linog tungod kay didto man kini mi-igo sa fault line gikan sa ilang siyudad lahos na ngadto sa Khost City.
Daghan matud pa ang nangamatay tungod kay natigayon kini pasado ala-1:30 kagahapon sa kaadlawon kon alas-singko na sa sayong buntag – oras sa Pilipinas diin tulog kaayo ang mga tawo.
Dakong factor usab ang paggamit sa mga residente og light materials diha sa ilang pagtukod og pinuy-anan diin ang kasagaran nilang gigamit mao lang ang yuta, bricks ingon man kahoy ug nipis nga puthaw rason nga dali rang hapayon kung duna’y kusog nga linog.
