BUTUAN CITY – Gitudlo ni Palace Press Officer Claire Castro ang kampo ni Vice President Sara Duterte nga gigikanan sa nanggawas nga mga tsismis bahin sa gika-ingong impeachment batok kang Pangulong Ferdinand Marcos Jr.
Sigon ni Castro, mismong si House Senior Deputy Minority Leader ug Caloocan 2nd District Rep. Edgar Erice, matud pa ang nagbutyag nga usa ka supporter sa mga Duterte ang nagtinguhang magduso sa maong impeachment complaint tungod matud pa sa betrayal of public trust.
Gitambagan ni Castro ang mga supporters sa Bise Presidente nga mas maayo nga tabangan una nila ang ilang idolo. Gituyo matud pa ang maong isyu aron ibali ang atensyon sa publiko gikan sa mga isyu nga nagsunod sa bise presidente, lakip na ang alegasyon sa pagpanikas ug pagdawat og milyones pesos nga pundo sa iyang kampanya gikan sa mga drug lords.
Iyang gisulti nga nagpabilin nga dili matandog ang Presidente sa maong mga tsismis, ug wala pa’y opisyal nga impeachment complaint nga gipasaka batok niini.
Dugang pa ni Castro kung aduna’y complaint nga ipasaka, tahuron matud pa kini sa presidente base sa Konstitusyon ug legal nga proseso.
Sa mga nanawagan alang sa accountability nga naglakip sa bise presidente, gibutyag ni Castro nga ang angay manubag, manubag gayud lakip na ang pagpasalig nga wala kini gitawag nga Mary Grace Piattos.
Sa pangutana bahin sa kahimtang ni kanhi kongresista Zaldy Co ug kanhi presidential spokesperson Harry Roque nga giingong anaa sa gawas sa nasud, gibutyag ni Castro nga mangayo siya og update niini gikan sa Department of Justice ug Department of the Interior and Local Government.
