BUTUAN CITY – Gipasakaan na og kasong graft ug plunder ngadto sa Office of the Ombudsman nila kanhi Senador Antonio Trillanes IV uban sa pipila ka membro sa civil society groups si Vice President Sara Duterte.
Sigon nila Trillanes ug Jocelyn Marie Acosta, ang founder sa Silent Majority Movement kon TSM, ang maong mga kaso duna’y kalambigitan sa inisyal nga gipasakang kaso niadtong Disyembre ning mi-aging tuig may kalabutan sa isyu sa confidential funds sa Office of the Vice President.
Nagtuo silang daghan og gilapas sa balaud ang besi presidente rason nga dili na nila palabyon pa ang kahigayunan nga makasuhan kini.
Dugang ni Acosta, ang maong mga kaso nagsumikad sa wala matud pa ma-liquidate nga kapin sa 650-milyunes pisos nga confidential funds sa Office of the Vice President ug sa Department of Education ug sayop nga paggamit sa ubang pundo sa katawhan.
