BUTUAN CITY – Gipa-imbestigahan na sa Sanguniang Panglungsod sa Surigao City ang nag-viral na video diin nahulog ang pasyente sa dihang gikanaog na kini sa ambulansiya sa usa ka pribadong ospital sa siyudad.
Sigon ni Surigao City Vice Mayor Alfonso Casurra, nagreklamo ang hingtungdan sa pasyente ngadto sa ilang hawanan mahitungod sa kapalpakan sa mga responders diin nahulog ang pasyente.
Kini ilabina kay namatay ang maong pasyente nga taga Barangay San Juan sakop sa maong siyudad.
Sumala pa sa Vice mayor, kuhaan nila ug panig ang hingtungdan ug isunod usab ang pagpasabot sa pribadong ospital.
Gikadismaya usab kini sa opisyal tungod kay igo matud pa ang ilang gigahing pondo para sa ekwepo sa mga ambulansiya rason sa iyang pagsaad nga manubag ang nakasala sa nasangpit nga panghitabo.
Gikumpirma usab sa opisyal nga dili edited ang maong video kansa nagpakita ug kawalay kahibalo sa mga responders ug kakulang sa kahimanan.
